21 қазан күні әр сәрсенбі күні болатын «Шуақ» балалардың шығармашылық студиясының сабағы өтті. М.Жаманбалинов «Көңілді қолшатыр» өлеңінің негізінде «Түрлі – түсті қолшатыр» тақырыбында аппликациялық жұмыс жасалынды. Бүгінгі сабаққа біздің кішкентай оқырманымыз балалар және жасөспірімдер үйінің тәрбиеленушісі Акишева Назерке ерекше ынтамен қатысты.

Кітапханада 15 қазан күні «Рухани келісім – бірлік пен тұрақтылық кепілі» атты кітап көрмесі ұйымдастырылды. Көрме елімізде жыл сайын 18 қазанда атап өтілетін Рухани келісім күніне арналып орайластырылған.

Бұл күнді мерекелеудің басталуы 1992 жылы қазанда Алматы қаласында Рухани келісімнің 1-ші әлемдік конгресі өтті. Конгреске қатысушылар қазанның 18-ін рухани келісім күні – қақтығыстар мен жанжалдарға тоқтам салу күні, татулық іздеу күні, жақынға қайырымдылық және көмек күні деп жариялау туралы манифест қабылдады. Бүгінде республикада 140-тан астам ұлттар мен ұлыстар және 18 конфессия өкілдері тату-тәтті өмір сүріп жатыр. Республикамызда мекендейтін барлық халықтардың адамгершіл және рухани бірлігі еліміздің одан әрі гүлденуінің басты іргетасы. Бұл күнді бекіту бастамасы еліміздің Тұңғыш Президенті-Елбасы Н.Ә.Назарбаевқа тиесілі.

Айтулы шараға орай ұйымдастырылған кітап көрмесі жас оқырмандарды ұлтаралық және конфессияаралық қатынастар саласындағы мемлекеттік саясат, Қазақстанның көпұлтты халқының қалыптасу тарихы туралы баяндайтын өзекті басылымдармен таныстырады.     Кітапхана пайдаланушылары кітап көрмесімен  қашықтықтан танысып, көрмені қашықтықтан тамашалай алатын мүмкіндіктері бар.

Көрме материалдары бойынша ең қызықты және танымдық басылымдар бойынша виртуалды шолу жасалды. Виртуалды  шолу кітапхананың барлық әлеуметтік желілерінде орналастырылған. Сондай-ақ, оқырмандардың көрме мен онда ұсынылған кітаптар туралы қосымша ақпарат алуы үшін кітапханаға онлайн-режимде хабарласу мүмкіндігі бар.

14 қазан күні «Шуақ» балалардың шығармашылық студиясының кезекті сабағы өтті. Сабақта ақын Қадыр Мырза Әлидің «Сағат сыры» өлеңі негізінде «Көңілді сағат» тақырыбында аппликациялық жұмыс жасалынды.

Бүгінгі сабағымыздың белсенді қатысушылары №17 мектептің 4 «а» сыныбының оқушылары Қайыркен Жансая, Секен Аяулым және 2 «ә» сыныбының оқушысы Қайыркен Қуаныш.

14 қазанда кітапханаға № 17 ЖОББМ 6-сынып оқушылары келді. Балаларға «Кітапхана шақырады….» таныстыру экскурсиясы өткізілді. Оқушылар кітапхана тарихынан жалпы мағлұмат алып, бөлімдердің қалай жұмыс істейтінін және оқырмандарға қандай кітапханалық қызметтер көрсетілетіні жайлы білді.

Кітапхана жаңа оқырмандарды тарту және балалар әдебиетін насихаттау бойынша белсенді бұқаралық жұмыс жүргізеді.

Қорлар тез арада жаңа кітаптармен және классикалық және де заманауи танымал авторлардың жаңа басылымдарымен жинақталады.

Қазіргі жағдайда көбірек қызметтер қашықтан көрсетіледі. Кітапхана оқырмандарға виртуалды анықтама, онлайн-ұзарту және басқа да сервистерді ұсынады.

Пайдаланушылар көптеген пайдалы ақпаратты әлеуметтік желілердегі кітапхана парақшаларынан және сайттан таба алады.

Қарағанды қаласының 4-6 сынып оқушыларының арасында өткізілетін «Соғыс жайлы бірер сөз. Я расскажу вам о войне»  атты байқауымыз қазіргі таңдағы жағдайға байланысты 2021 жылға ауыстырылды.

Өтініш қалдыру мерзімі 2021 жылдың 15 қаңтарына дейін ұзартылады.

Сізді байқау қатысушы ретінде көруге қуаныштымыз!

Байқау шарттары өзгеріссіз қалады.

Қосымша сұрақтар бойынша байқаудың ұйымдастырушысы Кучаева Елена Олеговнаға хабарласа аласыздар. ж.т. 8(7212) 412325;  сот. 87786272300

«Рухани жаңғыру» бағдарламасы іс-шараларының республикалық тізбесіне енгізілген «Жетістік формуласы» кітапханалық жобасының аясында 2020 жылғы 7 қазанында «SARYARQA» телеарнасында кезекті телевизиялық түсірілім өтті.

Диалог алаңында Ақтау қаласынан келген жас педагог, Англияда өткен ұстаздар арасындағы халықаралық байқаудың «Әлемдегі үздік химия пәнінің мұғалімі» номинациясы бойынша жеңімпазы Жігер Ерболұлы Телюқанов  №1 «Білім-инновация» лицей-интернаты, №92 гимназия және №17 ЖББОМ оқушыларымен кездесті.

Кездесу барысында жас педагог өзінің балалық шағы мен өскен ортасы, ұстаздық мамандықты қалай таңдағаны туралы, өзінің болашақта қол жеткізуді мақсат етіп қойған армандары жайлы мектеп оқушыларына баяндап берді. Оқушылар кездесу қонағына бүгінгі химия ғылымы мен оның дамуы туралы, химик болудың қыр-сыры, өмірлік ұстанымдары мен ұстаздық етудің қоғамдағы ролі жайлы сұрақтарын қоя отырып, осындай жетістікке жетуінің сырына үңілді.

Жігер Ерболұлы оқушылардың әр түрлі сұрақтарына жауап бере отырып Лондон қаласында өткен байқау мен одан алған әсерін ортаға салды. Аталмыш конкурсқа әлемнің 100-ден аса ұстаздары қатысыпты. Сайыстың жеңімпазына Англияда тегін магистрлік білім алу сертификаты табысталған. Алайда Жігер гранттан бас тартып, елге қызмет етуді жөн деп тапқан. «Біздің борышымыз бар. Абай Құнанбаев, Әлихан Бөкейханов, Ахмет Байтұрсынұлы сияқты біздің ұлы зиялыларымыз өз заманында жастарға білім беру керек деп өздерінің жанын пида еткен болса, дәл солардың жолын қуатын тек қана қазақтың қарапайым қара домалақ баласының біріміз ғой”, – дейді педагог. Қазақ ұлттық университетінде оқып, білімін Англия мен Францияда жалғастырған Жігер Телюқанов жеті тілде еркін сөйлейді.

Бенефис-шоудың шарты бойынша қонақ өзіне ұнаған үздік сұрақты таңдап, сұрақ авторына арнайы дайындап әкелген сыйлығын естелік ретінде берді.

Жоба ұйымдастырушылары – Қарағанды облысының мәдениет, архивтер және құжаттама басқармасы мен Абай атындағы Қарағанды облыстық балалар кітапханасы Жігерге табыстылық пен танымалдықтың символы «Жетістік формуласы» кәдесыйын және Абайдың «Қара сөздері» мен Ахмет Тоқтабайдың «Қазақ жылқысының тарихы» атты кітабын табыс етті.

7 қазан күні «Шуақ» балалардың шығармашылық студиясы өзінің сабағын қайта бастады.

Сабақта біздің кішкентай оқырмандарымыз О.Иркегулова  «Бақша.Огород» кітапшасының негізінде «Көңілді асқабақ» тақырыбында аппликациялық жұмыс жасады.
Бүгінгі сабаққа «Бақыт» балабақшасының бүлдіршіні Рахметулла Асланби белсенді қатысты.

2020 жылдың 6 қазанында кітапханалық жоба аясында «SARYARQA» арнасында «Жетістік формуласы» бағдарламасының кезекті телевизиялық түсірілімі өтті.

Сұхбат алаңында кәсіпкер, инвестор, Tenderbot.kz, Taxi.kz, Prodazhi.kz, Econsulting.kz, Business consulting groups холдинг компаниясының басшысы, «От таксиста до миллионера» кітабының авторы Тимур Құдайбергенов  №38, №93 гимназия және №17 ЖББОМ-тің жоғары сынып оқушыларымен (22 адам) кездесті.

Жерлесіміз Тимур Құдайбергенов Қарағанды облысының Молодежный кентінде дүниеге келген. Жас табысты кәсіпкер өз естеліктерімен бөлісіп,  әкесі дүниеден ерте озғандықтан, бала кезінде ерте есейіп, ақша табудың амалын ерте ойлағанын есіне алды.

Студияның құрметі қонағы мен оқушылар арасында ашық, емен-жарқын әңгіме-сұхбат құрылды,  «Волгоград мен таңертең заңгер болып жұмыс істедім, түстен кейін Мемлекеттік қызмет академиясында оқыдым, ал кешке  техникалық университетте, себебі екінші жоғарғы білім алуды көздегенмін. Кешкі сағат 10- нан кейін «семерка» деген жеңіл көлігіммен түнгі сағат 3- ке дейін таксиде  жүргізуші болып жұмыс істедім. Ал демалыс күндері мен мүлде ұйықтамайтынмын»,- дейді өз сөзінде. Тимурдың алғашқы сәтті бизнес-жобасы «Тифа» диспетчерлік такси қызметі болатын. Бірақ болашақ миллионер мұнымен тоқтамады, оны ІТ технологиялар қызықтырды, өз ісінің кәсіби шеберлерінен топ жинап, мобильді бағдарламалармен жұмыс істей бастады. Ісі жүзеге асқан Тимур қазіргі уақытта инвесторлардың қатарында.

Балалар қонағымыздан «Ешқашан ұялма және өз мақсатыңды қоя біл», «Бәсекелестеріңді жеңуге үйрен», «Әрбір сәтсіздік-бұл тәжірибе»- сынды көптеген кеңестер естіді. Сондай-ақ, қонақ бағдарлама қатысушыларына Д.Трауттың «Маркетинговые войны», К.Чанның «Стратегия голубого океана», Н. Талебтың «Черный лебедь»   атты кітаптарын оқуға кеңес берді.

Қонақ ең үздік сұрақтары үшін  №38 гимназияның оқушылары Алина Тукманова, Карина Касымова және Ангелина Цейтлерге «От такиста до миллионера» атты кітабын сыйға тартты.

Бағдарлама соңында ұйымдастырушылар Тимурға табыстылық пен танымалдықтың  символы «Жетістік формуласы» кәдесыйын және А. Құнанбаевтың «Қара сөзі» мен  А. Тоқтабайдың «Қазақ жылқысының тарихы»  кітаптарын табыс етті.

Кітапханада 30 қыркүйек күні «Балалар кітапханасы өскелең ұрпақты патриоттық тәрбиелеудің ресурсы ретінде» облыстық практикалық онлайн-семинары ZOOM платформасында өтті Бағдарлама.

Семинарға Қарағанды қаласы мектеп кітапханаларының меңгерушілері және де облыс бойынша 31 балалар кітапханаларының 92 маманы қатысты.

Шара барысында Қарағанды облысының балалар кітапханалары жағдайында патриоттық тәрбие беру бойынша жұмыс тәжірибесі, мәселелері мен мүмкіндіктері қарастырылды.

Саран қаласының балабақшаларымен табысты ынтымақтастық тәжірибесі және Шет ОКЖ аудандық балалар кітапханасына жаңа оқырмандарды тарту бойынша жұмыстардың жаңа түрлері туралы айтылды.

Кітапханашылардың назарына халықаралық, облыстық балалар шығармашылық байқауларына шолу ұсынылды, оған Қарағанды облысының барлық балалар кітапханаларының оқырмандары қатысты. Сондай-ақ, кітапхана тарапынан қатысушыларға «Ғылыми-медициналық қоғам» қоғамдық бірлестігінің ұйымдастыруымен өтетін «Кел, ертегі суретін салайық!» халықаралық байқауының ережесі ұсынылды.

«AutoPlay Media Studio8»  және «Movavi Video Editor Plus» бағдарламасын   пайдаланып, өлкетану электрондық әдістемеліктер, викториналар жасау» – практикалық сабағы қатысушылардың қызығушылығын оятты.