17 наурызда «Қызықты ғылым» атты кітапханалық зертхана аясында астрономиялық сағат өткізілді, онда балалар телескоптың құрылғысын зерттеп, түрлі сайттармен танысты смартфондардағы телескопты алмастыра алатын арнайы қосымшалармен жұмыс істеу арқылы аспан әлемі жайлы қызықты мәліметтерге қол жеткізуге болатынын білді.
Қосымша ақпарат көзі ретінде астрономия және ғарыш туралы кітаптарға шолу жасалды.

Кез-келген кітапханада оқырмандар ұмытып кеткен қызықты бетбелгілер болады. Біздің кітапхана оларды «Ұмытылған бетбелгілер коллекциясы» деп атадық.
Көптеген бетбелгілер қарапайым, кейбіреулері қызықты өте ерекше. Оқырмандар кітаптардың арасында спектакль билеттерін, визиткаларды, анықтамаларды, жеке жазбаларды, фотосуреттерді, ашық хаттарды, түбіртектерді және басқа да көптеген заттарын ұмытып қалдырады.
Біздің коллекцияларды қарап шығыңыз, мүмкін сіз осы жинақтар арасынан өз заттарыңызды табасыз…

Балалар Н.Инжевскаяның «Тюльпан счастья» кітабын оқып болған соң, алған әсерлерімен бөлісіп, түрлі-түсті қағаздан «Қызғалдақ» қолөнерін жасауды ұйғарды.

Ұлыстың ұлы күні – Наурыз мерекесі қарсаңында кітапханада «Нұр себеле, Ұлыстың ұлы күні!» этновитражы ұйымдастырылды.
Мерекеге арналып жасалған кітап көрмесі Наурыз тойының табиғатын, шығу төркінін, мазмұны мен мәнін, халықтың мәдени-рухани өміріндегі орнын баяндап, қазақ халқының салт-дәстүрі, әдет-ғұрпы мен қолөнері, ұлттық тағамы туралы насихаттады.
Этновитраж Наурыз мерекесінің ерекшеліктері – көктемгі күн мен түннің теңелу күні туралы білімді кеңінен насихаттауға бағытталған.

«Free Style» арт-шеберханасының кезекті сабағы «Үкілі түйреуіш» жасау тақырыбында өткізілді. Үйірме мүшелері киіз мата, жіп, ине, қайшы, түйреуішке арналған бекіткіш, моншақтар, бисерлерді пайдалана отырып қарапайым және әдемі түйреуіш жасап үйренді.
Киізден жасалған гүлді түйреуіш кез-келген киімге өте нәзік және мәнерлі көрінеді.

10 наурыз күні «Қызықты ғылым» кітапханалық зертханасында «Ақпараттық технологиялар» мектебінің оқушыларының қатысуымен «Ньютондық емес сұйықтықпен» тәжірибе өтті.
Кейбір сұйықтықтар су секілді тез құйылса, біз тәжірибеде көрсеткен сұйықтық тығыз және бал секілді тұтқыр, жабысқақ болып келеді.
Зертханалық жұмысты жасау барысында оқырмандарымыз көптеген қызықты мәліметтермен танысып, Ричард Хаммондтың «Күштің сыры неде?» атты кітабында көрсетілген Ньютондық емес сұйықтықтар туралы білудің ең оңай тәсілі арқылы шырыш дайындап, оның тылсым сырына үңілді. Сондай-ақ ғылыми терминдермен танысты. Сұйық нысанды полимерлерден, яғни Ньютондық емес сұйықтықтардан қандай зат жасауға болатыны жайлы Роберт Уинстонның «Ғылыми эксперименттер» кітабында көрсетілген тәжірибеге сүйене отырып түсіндірдік.
Құрметті ЖАС ҒАЛЫМ, ғылымның сансыз сұрақтарына жауапты тек біздің кітапханадағы кітаптардан таба аласың. Кел, зертхана жұмыстарын өз қолыңмен жасап, әсеріңмен бөліс!

«Кел, қазақша сөйлейік!» үйірмесінің кезекті сабағы «Сиқырлы түстер еліне саяхат» тақырыбында өткізілді. Үйірме сабағында балалар түстерді қазақ тілінде айтып, түрлі ойындар, сөзжұмбақтар шешіп, «Түстер» әнің орындады.

   Көңілдеріңізге көктем шуағындай сезім мен нұр құйып, тағы да 8 наурыз халықаралық әйелдер күні келді. Айтулы мерекеге орай кітапханада ғажайып фото-аймақ және тақырыптық сөре ұйымдастырылды. Фото-аймақ аясында әр оқырман бала өмірдің гүлі, көңілдің жыры, әр отбасының алтын діңгегі ақжаулықты аналар мен әжелерді, туыстарын, достарын және таныстарын құттықтауға мүмкіндік ала алады.

Кітапханада 8 наурыз Халықаралық әйелдер күні мерекесіне арнап №88 ЖББМ 3 сынып оқушыларының қатысумен «Анамның сүйікті кітабы» атты әдеби сағат өткізілді. Балалар аналары балалық шағында қандай кітаптар оқығаны туралы бейнероликтер дайындап көрсетті.
Ұл балалар «Әйелдер қол сөмкесі», «Гүлді шалғын», «Проверка на внимательность», «Ханшайым мен бұршақ» және т.б танымдық ойынға үлкен қызығушылықпен қатысты. Шара соңында кітапханашы балалардың назарына ата-аналары арасында жүргізілген сауалнама нәтижесі бойынша дайындалған «Анамның сүйікті ертегісі» слайд ұсынды.

Абай атындағы кітапханада «Сыбайлас жемқорлық – қоғамның өзекті мәселесі» атты тақырыптық көрме ұйымдастырылды.
Кітап көрмесі оқырман балаларды сыбайлас жемқорлық ұғымымен және оның қоғамдағы әртүрлі көріністерімен таныстыруға бағытталған. Көрмеге кітаптар, мерзімді басылымдар, интернет-ресурстардың материалдары қойылды. Көрме 6 сәуірге дейін жалғасады.