2022 жылғы 13 желтоқсанда С.Сейфуллин атындағы Қарағанды облыстық академиялық қазақ драма театрында Қарағанды облысының мәдениет, архивтер және құжаттама басқармасының қолдауымен облыс кітапханаларында Балалар жылының қорытындысы бойынша салтанатты рәсім өтті.
Салтанатты рәсімде Балалар жылының қорытындысы және облыстың 2022 жылғы Үздік кітапханаларының байқауы сонымен қатар балаларға арналған Үздік жоба жеңімпаздары анықталды.
Жеңімпаздарды дипломдармен және алғыс хаттармен ҚР Еңбек сіңірген қайраткері, «Парасат» орденінің «Ерен еңбегі үшін» құрметті атағының иегері Р. К. Омарбекова, «Қазақстан – Қарағанды» ТРК Қарағанды облыстық филиалының директоры Б. С. Дүйсетаев, ҚР Мәдениет қайраткері, кітапхана ісінің ардагері Г.Ә. Бекбалакова, бала құқықтары жөніндегі уәкіл И.Б. Киселева, «Дарынды бала» көшбасшылықты дамыту балалар орталығының құрылтайшысы, «Алтын алқа» төсбелгісінің иегері А. Қ. Хамитова сынды құрметті қонақтарымыз марапаттады.
«Үздік қалалық балалар кітапханасы» номинациясы бойынша Балқаш ОКЖ А. Гайдар атындағы орталық қалалық балалар кітапханасы марапатталды.
«Үздік аудандық балалар кітапханасы» номинациясы бойынша Қарқаралы ОКЖ орталық аудандық балалар кітапханасы жеңімпаз атанды.
«Үздік ауылдық балалар кітапханасы» номинациясында – Нұра ОКЖ Мыңбаев ауылының балалар кітапханасы марапатталды.
«Балалар жылында балаларға арналған үздік жоба» номинациясы бойынша Қарағанды ОКЖ балаларға қызмет көрсету бойынша № 12 кітапхана-филиалының «Әлем мейірімге толы болсын» атты ерекше балалармен жұмыс жөніндегі жобасы ең қызықты әрі лайықты деп танылды.
Барлық жеңімпаздар Қарағанды облысының мәдениет, архивтер және құжаттама басқармасының дипломдарымен және 200 мың теңге көлеміндегі сертификаттармен марапатталды.
Мерекелік іс-шараға білім беру саласының өкілдері, бұқаралық ақпарат құралдарының өкілдері, балалар жазушылары мен ақындары, «Ертегілер мен оқиғалар сағаты» облыстық жобасының қатысушылары, серіктестер мен демеушілер шақырылды.
Қарағанды облысының мәдениет, архивтер және құжаттама басқармасының алғыс хаттарымен марапатталды:
Үздік оқырмандар- мамандандырылған музыкалық мектеп-интернатының 9 «А» сынып оқушысы Акеева Аяжан; №27 мектептің 7 «А» сынып оқушысы Егінбай Мәди; № 23 мектептің 2 сынып оқушысы Ерғалы Әлихан; көру қабілеті шектеулі балаларға арналған №1 арнайы мектеп-интернатының 4 «Г» сынып оқушысы Қайыржан Нұрсұлу; 7 «А» көру қабілеті шектеулі балаларға арналған №1 арнайы мектеп-интернатының 7 «А» сынып оқушысы Харрасова Камила; №27 мектептің 5 «Б» сынып оқушысы Македонец Анастасия.
Ең көп оқитын отбасылар – Василечко отбасы, Инкарбаевтар отбасы, Тарабукиндер отбасы, Бизақовтар отбасы.
Серіктестер, демеушілер – «АЙЗА компаниясы» ЖШС директоры Г.В. Якимов; «Радуга әлемі» мерекесі студиясының жетекшісі А. А. Әбішева; жазушы, ата-аналар университетінің кураторы, «Талант» шығармашылық студиясының жетекшісі И. Н. Воронков; «№3 Автопарк» ЖШС директоры А. М. Григорян; «Богатырь» өндірістік-сауда компаниясының басшысы Бондаренко О. Ю.; «QASYM БАСПА ҮЙІ» ЖШС директоры Қасембекова А. К.
Мектептер- № 97 мектеп – гимназия, Н. Нұрмақов атындағы дарынды балаларға арналған облыстық мамандандырылған мектеп-интернат, № 4 мектеп-интернат, «Бастау» қазіргі заманғы білім беру мектебі, А. Байтұрсынов атындағы мектеп – гимназия, Абай атындағы № 104 мектеп – гимназия, «Ақпараттық технологиялар» мамандандырылған мектеп – лицей – интернаты, мектептер №25; № 27, №30.
Салтанатты іс-шара барысында Абай атындағы облыстық балалар кітапханасы мен зағип және нашар көретін азаматтарға арналған облыстық арнайы кітапхананың балалар жылында іске асырылған «Ертегілер мен оқиғалар сағаты» бірлескен жобасының тұсаукесері өтті.
Салтанатты рәсім барысында облыс кітапханашылары ҚР Ұлттық Академиялық кітапханасының алғыс хаттарымен марапатталды.

Шәкәрім атындағы гимназияның бастауыш сынып оқушыларына «Шәкәрімнің өсиеті – адалдық айнасы» атты адалдық сабағы өтті.
Сабақ барысында кітапханашы оқушыларға ұлтымыздың көрнекті өкілдерінің бірі, дала ойшылы атанған философ ақын – Шәкәрім Құдайбердіұлының өмір жолы туралы қысқаша айтып өтті.
Балалар ақынның адами құндылықтар туралы, білімдіден ғибрат алуға, ақылмен ойлап, іс қылуға, «адамдық борыш – ар үшін қызмет ету» жөніндегі өсиеттерімен тереңірек танысты.

Міне, Елбасымыз Қасым-Жомарт Тоқаев «Балалар жылы» деп жариялаған 2022 жыл да аяқталуға жақын қалды. Жыл бойы Балалар жылының аясында балаларға кітапты насихаттаудың сан-алуан формалары қарастырылды. Сондай ерекше формада ұйымдастырылған іс-шарамыздың ең соңғысы 9 желтоқсанда өткен « Әдеби Косплей» фестивалі. Фестивалге 39 өтінім беріліп, олардың төртеуі отбасылық косплей қатысушылары болып тіркелді. Қатысушыларымыз түрлі бейнелерді сомдау кезінде көп еңбектенгендерін көрсетті.
Шара барысында көрсетілген бейнелер батырлар жырындағы Қобыланды мен Алпамыс батырларымыз, орыс халық ертегісіндегі кейіпкерлер авторлық бейнелер, түрлі әдеби образдар бой көрсетті. Сонымен қоса әдеби викторина өткізілді. Қатысушыларымыз өз қалауларымен түрлі өнерлерін көрсетіп, кейіпкердің мінез-құлқын аша түсетін көріністермен толықтырып, актерлік шеберліктерін паш етті.
Косплей қатысушылары түрлі номинациялармен марапатталды. «Үздік көркем бейне» номинациясымен «Кавказ тұтқыны» шығармасынан Дина бейнесіндегі С.Ізтілеу, Ш.Перроның Золушка бейнесіндегі Д.Кулькеева марапатталса;
«Үздік балалар косплейі» номинациясымен Қожа бейнесін өте шынайы алып шыққан М.Болатбеков, «Приключения Маша и Вити» филіміндегі Ақшақар бейнесіндегі Е.Шелухина марапатталды.
Ал, «Үздік MAKEUP – бет әлпеті образы» номинациясымен Л.Кэролдың «Алиса в стране чудес» шығармасынан Червонная Королева бейнесінде У.Соснова, өзі жасаған бейнемен С.Шакирова сынды қатысушыларымыз марапатталды.
Қатысушының авторлық бейнесі бойынша «Original – косплей» номинациясымен Буратино образын өте шынайы сомдаған В.Шлыков, «Мальвина» образындағы А.Акжанова марапатталды.
«Ең үздік отбасылық косплей» номинациясы бойынша – “Алисаның Ғажайыптар еліндегі шытырман оқиғалары” ертегісіндегі Алиса бейнесіндегі Трофименко Эрика және оның анасы Трофименко Виктория; және «Клинок» анимесіндегі Зенуцу Агацума, Танджиро Камадо образын сомдаған Чепурина Арина мен Эдель Александра марапатталды.
Фестиваль «Оранжевый ёжик» агенттігінің би кешімен жалғасты.
«Әдеби Косплей» фестивалінің өтуіне қолдауларын білдірген кітапхана серіктестеріне алғысымызды білдіреміз.Олар:
«Асыл-Түлік Қарағанды» компаниясының төрағасы А.Қ.Күлмағанбетов; ЖШС «Навин-KZ» А.Н.Югай.; «Палермо» рестораны, «Галерея»СҮ, ұлттық бұйымдар дүкені; «Cocobe» кеңсе тауарлары мен бабаларға арналған дүкен; Жеке кәсіпкер Мекеева Г.; «Киноплекс» және «Сарыжайлау» кинотеатрлары; «ZamZam» балалар тауарлары дүкенінің иесі И.Р. Кенешбаева.
Құрметті оқырман қауым, кітап оқып қана қоймай, кейіпкерлермен сырласуды да ұмытпаңыздар!

07 желтоқсанда «Ертегілер мен оқиғалар сағаты» жобасы аясында кезекті дауыстап оқу өткізілді. Балаларға әнші, вокал ұстазы Думан Баймағамбетов әйгілі испан жазушысы Росион Бонильяның «Көршілер» атты шығармасын оқыды.

6 желтоқсанда «SARYARQA» телеарнасында жас кәсіпкер, қарағандылық, «Sweatberry Tours» компаниясының негізін қалаушы, Forbes 30 Under 30 тізіміне енген саяхатшы Ерлан Амангелдиновтың қатысуымен «Жетістік формуласы» бағдарламасының кезекті түсірілімі өтті.
Студияға Қарағанды «Bolashaq» жоғары колледжінің және экономика, бизнес және құқық колледжінің студенттері, сондай-ақ Шәкәрім атындағы гимназияның 10-11 сынып оқушылары жиналды.
Бағдарламаның қонағы Ерлан Амангелдинов 28 жасында көп нәрсеге қол жеткізді. 2017 жылы ол өзінің авторлық турларын аша отырып, саяхат агенттігін ұйымдастырды. Ерланның айтуынша, барлық туристер бірге саяхаттанған адамдарға байланысты саяхатқа риза бола бермейді, сондықтан ол туристер үшін барынша жайлылық жасауды мақсат етіп қойды.
«Sweatberry Tours» агенттігі жас энтузиастар жұмыс істейтін авторлық турларды ұйымдастыру бойынша Қазақстандағы ең ірі агенттіктердің бірі. Ерланның өзі 40 елде болған, бірнеше шет тілдерін жақсы біледі.
Кездесуге қатысушылар әр түрлі сұрақтар қойды: Біздің кейіпкерімізге немқұрайлылық жағдайы таныс па?; Ол қай футбол клубын қолдайды?; Жер бетіндегі ең жақсы қала қандай? және т.б. сұрақтар төңірегінде сұхбат болды. Ерлан барлық сұрақтарға шынайы және ашық жауап берді. Оның өмірлік ұстанымы: «Барынша шынайы болу». Кездесуге қатсушы жастар Ерланның әзілқойлығын ерекше атап өтті.
Бағдарламаның финалында белсенді қатысушылар саяхатшыдан естелік сыйлықтар алды, қонаққа дәстүрлі түрде Абай Құнанбаевтың «Қара сөздері» кітабы және жетістік пен танымалдықтың символы – «Жетістік формуласы» кәдесыйы табыс етілді.

1 желтоқсан күні «SARYARQA» телеарнасында «Жетістік формуласы» бағдарламасының кезекті түсірілімі Құрманғазы атындағы Қазақ ұлттық консерваториясының ректоры, Қазақстан Республикасының еңбек сіңірген қайраткері Арман Жүдебаевпен өткізілген болатын.
Қонақпен кездесуге Тәттімбет атындағы Қарағанды өнер колледжі, Қарағанды жоғары гуманитарлық колледжінің студенттері мен мамандандырылған музыка мектеп-интернатының оқушылары келді. Балалар мен қонақ арасындағы диалог көңілге жағымды, өте әсерлі өтті.
Кездесу барысында қонақ отбасы, балалық шағы, шығармашылық жолы жайлы айтып, сахнада болған қызықты оқиғаларын еске түсіріп әңгімелеп берді.
Арман Әділханұлы бала кезінде спортқа жақын болып өскен екен. Бала Арман футболист болуды армандаған. Ата-анасы кішкентайынан бастап қазақтың дәстүрі мен салт-санасын бойына сіңірсе керек. Міне, соның арқасында құрметті қонағымыз қазақ даласына қасиетті домбыра өнерін насихаттауда. «Үйдің жақсысы – ағашынан, жігіттің жақсысы – нағашынан» демекші ең алғаш домбыраға деген сүйіспеншілігі, өнерге деген қызығушылығы нағашы апасынан дарыған екен.
«Сiз үшiн күйдiң қасиетi мен киелi домбыраның құдiретi неде?» – деген сауалға: «Күй – терең ұғым. Күй бар жерде қазақ бар, қазақ бар жерде күй бар. Домбыра – қазақтың жаны. Сонау Қорқыт, Құрманғазыдан жеткен киелі аспап», – деді дирижер.
Диалог алаңының қатысушылары Арман Әділханұлынан оның жетістік формуласын білді. Құрметті қонақтың айтуы бойынша: «Адамның жүрек қалауына байланысты. Жетуге мақсат қойып, армандаңыздар. Еңбек жолында көп еңбек етсеңіздер, уақыты келгенде жемісін көресіздер».
Әңгімелесу барысында жастар өздерінің көкейлерінде жүрген сұрақтарын қойып, болашақ өнер жолын таңдаған жас мамандар үлкен рухани азық алды.
Бағдарлама соңында Арман Әділханұлы студенттердің сұрауымен қонақ кәде ретінде Нұрғиса Тілендиевтің «Әлқисса» күйін орындады.
«Жетістік формуласы» телевизиялық жобасының шарты бойынша қонақ өзіне ұнаған үздік сұрақтарды таңдап, балаларға естелік ретінде «Ұлы дала сарындары», «Халық музыкасы – ұлттың үн-байрағы» күй жинақтарын сыйға тартты.
Жоба ұйымдастырушылары Арман Әділханұлы Жүдебаевқа А.Құнанбайұлының «Қара сөздері» кітабын және жетістік пен танымалдықтың символы – «Жетістік формуласы» кәдесыйын табыс етті.

«Кел, қазақша сөйлейік!» үйірмесінің жетекшісі сабаққа қатысқан балаларға «Жыл айларының атауларын» таныстырып өтті.
Балалар он екі ай атауын ребус, сөйлемдерді толықтыру арқылы шешіп үйренді. Сабақ көңілді және қызықты болды.

29 қарашада «SARYARQA» телеарнасында «Жетістік формуласы» бағдарламасының кезекті түсірілімі өтті. Бағдарлама қонағы қазақстандық танымал ғалым, ҚР білім беру жүйесінің қайраткері, заң ғылымдарының докторы, профессор, Ұлттық ғылым академиясының корреспондент-мүшесі, «Карлаг – болашақ үшін естелік» жобасының авторы мен жетекшісі, Академик Е.А.Бөкетов атындағы Қарағанды университетінің ректоры Нұрлан Орынбасарұлы Дулатбеков болды.
Қонақты студияда Ә.Сағынов атындағы «Қарағанды техникалық университеті» КеАҚ Инновациялық технологиялар колледжі мен «Қарағанды экономика және статистика колледжі студенттері және «Ақпараттық технологиялар» мамандандырылған мектеп-лицей-интернатының оқушылары қарсы алды.
Бағдарлама кейіпкері өзінің жетістіктері, қызығушылықтары туралы әңгімелеп, балалық шағындағы бақытты сәттерін еске түсірді, балаларды армандауға, көп талмай еңбектенуге және тарихты оқуға шақырды. «Тарих – қайталанып отыратын үрдіс, сол себепті біз әрқашан тарихтан сабақ алуымыз керек. Тарихымыздың жақсы жақтарын ғана емес, көлеңкелі жақтарын да зерделей білсек – үлкен мақсаттарға жететін жолды ашамыз, – деді ол.
«Қазіргі студенттерге көзқарасаңыз қандай?» – деген сауалға Нұрлан Орынбасарұлы «Студенттерді жақсы көремін, олармен еркін сөйлесіп, дос ретінде қарауға тырысамын. Мен тәрбие мен оқытуды ұнатамын, сол себепті осы мамандықты таңдадым» – деп жауап берді.
Қонақ өзінің көп кітап оқитынын атап өтіп, кездесуге қатысқан студенттерге М.Әуезовтің «Абай жолы» роман-эпопеясын, Ш.Айтматовтың «Жәмилә» повесін, поэзия алыптары М.Мақатаев, Қ.Аманжоловтың өлеңдерін оқуға кеңес берді.
Студияның құрметті қонағы мен балалар арасында ашық, емен-жарқын әңгіме-сұхбат болды.
«Жетістік формуласы» телевизиялық жобасының шарты бойынша қонақ өзіне ұнаған үздік сұрақтарды таңдап, студенттерге естелік ретінде сыйлықтарын ұсынды. Жоба ұйымдастырушылары Нұрлан Дулатбековке А.Құнанбайұлының «Қара сөздері» кітабын және жетістік пен танымалдықтың символы – «Жетістік формуласы» кәдесыйын табыс етті.

      Кітапханада 24 қарашада «Дарынды бала әлемі» жинағының I – ші томының тұсаукесері өтті. Кітапта қазақ және орыс тілдерінде мектеп жасына дейінгі және бастауыш мектеп жасындағы балалар үшін ең тиімді ертегілер жинақталған. Жинаққа енген ертегілер жас оқырмандарды батылдыққа, тапқырлыққа, әділеттікке, қайсарлыққа үйретеді. Ерекшелігі әр ертегі мақал-мәтелдермен аяқталатындағында, ал мақал-мәтел тәрбие беруде басты құрал.
Жоба авторы «Дарынды бала» балалардың көшбасшылығын дамыту орталығының құрылтайшысы – Айнагүл Қайырбекқызы Хамитова қатысушыларды жобаның басты мақсатымен таныстырып, кең көлемде ой бөлісті.
Сонымен қатар Қарағанды «Дарынды бала» балабақшасының ұстаздары кітапхананың кішкентай оқырмандары үшін шеберлік сабағын өткізді.

«Балалар, Сіздер үшін жазамыз!» кітапханалық жоба аясында 22-23 қараша күндері балалар жазушысы Наталья Инжевская Саран қаласы және Осакаровка ауылының оқырмандарымен кездесті.
Балалар үшін автормен жүздесу, оқыған кітаптары туралы өз әсерлерімен бөлісу, жазушының шығармашылық жоспарлары туралы білу қызықты болды.
Оқырман балалар Н. Инжевскаяның әңгімелерінен үзінді көрсетіп, өлеңдер оқыды. Жазушымен өткен шығармашылық кездесу балаларға өте қызықты болды.